На пазарите во Македонија нема краставици во кои беше најдено големо количество на опасна хемиска супстанца, пестициди, во лабораториите во Хрватска, од каде што беа и вратени. Ова за НОВА го тврдат во Агенцијата за храна и ветеринарство. Заменик директорот на Агенцијата Абдулезел Догани, потенцира дека контаминираните краставици во кои е најдено зголемено ниво на пестицидот хлорпирифос воопшто не се вратени назад во Македонија, туку се уништени во Хрватска.
Догани е дециден дека на пазарите во државата не се наоѓаат краставици кои имаат пестициди повеќе од дозволеното. Сепак, во Агенцијата не откриваат која е фирмата што извезувала вакви контаминирани краставици со опасната хемиска супстанца-пестицид во Хрватска, ниту од каде е потеклото на краставиците. Единствено се знае дека станува збор за корнишони, краставици кои служат за конзервирање, кои домаќинките ги ставаат во зимница овој период.
Инспекторите денеска биле на лице место и краставиците кои се затекнати во складот, не е дозволено да се продаваат на пазарот.
-Ние заедно со Фитосанитарната инспекција направивме контрола кај производителот, земавме три мостри од затекнатите краставици кои се однесени на испитување во Инститот за јавно здравје. Добиените резулатати покажаа дека се под максимално дозволеното присуство на пестиции изјави за НОВА Абдулезел Догани заменик директор на Агенцијата за храна и ветеринарство.
Но, неговиот одговор е различен од она што го добивме како одговор во Институтот за јавно здравје.
Од таму за НОВА потврдија дека денеска биле донесени три мостри за испитување на барање на Агенцијата за храна, не знаат од каде е потеклото на мострите, но велат дека анализите воопшто не биле завршени.
-Точно е дека се донесени три мостри за испитување од Агенцијата за храна, но анализите кај нас се уште не се завршени и резултатите не се готови, тврдат за НОВА во Институтот за јавно здравје.
Ова ја отвара дилема знаат ли граѓаните што јадат? Колку се сигурни земјоделските производи на македонските пазари, дали се контролира квалитетот на храната? Знаат ли всушност земјоделците колку е дозволената граница на пестиции со кои се прскаат овошјето и зеленукот?
-Како можам да бидам сигурен што јадам , кога од друга држава слушам дека македонски краставиците биле вратени како опасни по здравјето. Зошто инстуциите не излегоа први тоа да им го соопштат на граѓаните вели Слободан Д. од Скопје.
Граѓаните се уплашени и немаат доверба во институциите.
-Вознемирена сум, подготвувам зимница,а од неа ќе јадат и моите внучиња. На кого да му верувам, постојат ли стандарди во оваа држава со кои се регулираат овие работи прашува Наталија С. Која ја затекнавме на еден од скопските пазари.
Догани тврди дека земјоделските производи се безбедни. Тој вели дека минатата година биле направени 95 анализи и кај сите се покажало дека нивото на пестициди е во рамките на дозволените граници. Оваа година биле направени 105 анализи, а во периодот од 2013 до 2014 година планирано било да се направат над 505 анализи.
Засега, вели Догани можеме да кажеме дека нивото на пестициди во сите испитани производи не отстапува од дозволените граници. Сепак, признава дека не е возможно да се испита се што се продава на пазарот. Тој вели дека проблемот е кај индивидуалните земјоделци кои често производите ги продаваат директно од градината, некогаш во брзање за да го продадат произведеното кога ќе дојде купувачот воопшто не водат сметка кога било направено последното прскање велат стручњаците.
Токму таков беше случајот со двете пратки од 34 тона краставици кои ги открија хрватските инспектори. Сличен случај имаше и со јаболките, кога во мај годинава рускиот премиер Дмитриј Медведев им порача на трговците од својата земја дека увозот на земјоделски производи може да биде опасен по здравјето заради високите количества на пестициди и нитрати. Тој ги спомна јаболката од Полска и Србија,но од српската Стопанска комора тврдеа дека јаболката потекнувале од нелегален увоз на јаболка од Македонија.
Она, што зачудува е фактот зошто не се кажува кој е производителот и фирмата која ги извезла корнишоните. И во Стопанска комора денеска тврдеа дека не знаат која е фирмата која направила извоз на затруени краставици во Хрватска. Од таму велат дека Фирмата не контактирала со нив, не побарале помош или консултација, а немале никаков контакт ниту со Агенцијата за храна и ветеринарство.
Од Агенцијата за храна пак, велат дека Фирмата ќе биде санкционирана според законот за земјоделство, но нејзиното име останува енигма за македонската јавност.
НОВА се обрати и во Организацијата за потрошувачи, со прашање дали воопшто оствариле контакт со Агенцијата, добиле ли известување од таму за да можат да им објаснат на потрошувачите за што се работи.
-Ние не смееме да им упаднеме во системот на работење на Агенцијата за храна и Министертвото за земјоделие. Очекуваме овие две институции да извршат увид и дека краставиците ќе бидат уништени, и она што е најважно треба поголема контрола, санкции, но пред се едукација и обуки на земјоделците за правилна примена на пестициите. Инаку вака само се уништува имиџот на државата, изјави за НОВА Маријана Лончар од Организацијата на потрошувачи.
НОВА од Агенцијата за храна побара да и ги покаже резултатите од анализите и документите со кои се гарантира дека производи со опасна хемиска супстанца нема на пазарите во Македонија. Очекуваме тоа да го сторат во текот на денешниот ден.
Инаку, пестицидите се употребуваат заради заштита на земјоделските производи од штетници. Големите количини пестициди во производите предизвикува тешки здравствени проблеми, како што е развојот на канцерогени заболувања.