Македонската информативна агенција реагира за критиките на некои македонски медиуми во однос на нивното известување од конференција во Брисел посветена на слобода на медиумите „Спик ап“- МИА смета дека се целосно несоновани и паушални.
Во реакцијата се вели:
-Во врска со нападите врз Македонската информативна агенција во однос на известувањето од конференција во Брисел посветена на слобода на медиумите „Спик ап“, МИА смета дека се целосно несоновани и паушални.
Зачудени сме од неоснованата критика, и дополнително од фактот што критикуваат лица кои на само пет минути пред да ги изречат критиките кон МИА говорат за слобода на изразувањето, за правото на изразување и информирање.
Новинарите на МИА работат во согласност со сите стандарди. Другите медиуми, меѓу кои и оние што неосновано критикуваат треба да се грижат за својата професионалсност и етичност.
МИА, како и досега ќе продолжи да биде промотор на независното и објективно новинарство и на информирање според сите професионални стандарди и етички принципи, факт кој во јавноста е познат и признат, се вели во реакцијата на МИА.
Имено, НОВА вчера објави дека дописникот на МИА од Брисел, Бобан Нонковиќ во текст за бриселската Конференција извршниот директор на Здружението на новинари Драган Секуловски го нарече “Кодош кој ја ставил на тапет својата држава пред евробирократите во Брисел”, “извесен директор на ЗНМ кој повел тирада против земјата во Брисел”, што беше само дел од квалификациите на адреса на извршниот директор на Здружението на новинари Драган Секуловски.
Текстот се однесуваше на излагањето на Секуловски на тркалезната маса насловена “Правниот аспект на слободата на медиумите на Западниот Балкан” во организација на Поткомитетот за човекови права на ЕП која се одржа вчера во Брисел.
Текстот со наслов „Директор на ЗНМ во Европарламентот ја критикуваше Македонија, Ховит ја бранеше“ предизвика бура реакции во некои Портали, но и меѓу новинарите на социјалните мрежи кои коментираа дека содржината не е ништо освен хајка кон Секуловски кој ја изнесувал фактичката состојба за медиумите во земјата како гостин на трибината, но и лоша порака кон сите критични новинари, ако се има во предвид дека МИА е државен сервис каде Владата има својство на Собрание на друштвото и таа го именува надзорниот одбор.
Во текстот меѓу другото беше објавено: „Но, Секуловски тука не завршува, па ја искодоши својата држава и за тоа што Советот за радиодифузија ја одзел дозволата на телевизискиот канал “А2“….или „Својата тирада против државата Македонија, директорот од ЗНМ ја продолжи…; релативниот долгиот допис изобилуваше со вакви и слични квалификации на адреса на Секуловски, притоа истакнувајќи дека да не биле известувачот во ЕП за Македонија Ричард Ховит и пратеникот Илија Димовски, земјата „ќе останела неодбранета“.
Посочениот „кодош“ Драган Секуловски за НОВА изјави дека не тој, туку оние кои стојат зад текстот се тие кои го нарушуваат имиџот на земјата надвор.
– Срамно е тоа што овој текст е од Македонската информативна агенција која треба да ги промовира новинарските стандарди. Со ваков непрофесионален и неетичен начин на претставување на фактите се нанесува штета на Македонија пред високите претставници на Европскиот парламент и Европската комисија, кои беа присутни на сесијата организирана од страна на Комитетот за човекови права. За илустрација евро-парламентарката Дорис Пак на својот твитер профил во овој контекст напиша дека индивидуите и граѓанските организации кои даваат конструктивни критики не треба да се клеветени од страна на медиумите, вели Секуловски за НОВА.