Девет месеци по ослободувањето, сирискиот град Алепо се уште е во купишта урнатини. Во една од најстарите населби на светот животот дури сега почнува да се враќа. Си Ен Ен направи репортажа за тоа како се живее во овој град.
Во Алепо се водеше една од најголемите битки во Сирија откако провладините сили со помош на Русија започнаа конечна офанзива на Алепо кој дотогаш беше под контола на бунтовниците.
Девет месеци подоцна вториот по големина град во Сирија и натаму е целосно разурнат, но животот сепак полека се враќа во нормала. Илјадници раселени цивили се вратија во градот и повеќето од нив живеат само од хуманитарната помош. Секој ден се поголем број од нив се собираат околу местата каде што се дели помошта.
-Многумина се вратија, нема ништо, но помагаме колку што можеме, вели Абдул Рахман Разлук од една невладина организација.
Некои од продавниците повторно се отворени на местата кои некогаш беа под контрола на бунтовниците. Тие што ги поддржувале бунтовниците не ги изнесуваат производите на пазарот, плашејќи се од одмазда.
Луѓето со кои репортерот на Си Ен Ен разговара на улиците ги поддржуваат провладините сили и Русија.
-Русија е наш пријател, тие се со нас и ние сме со нив. Башар ел Асад и Русија се едно, вели Мустафа ел Баб, жител на Алепо.
Среде урнатини има знаци на обвнова. Внатре во разурнатите објекти, индустријата во Алепо почнува да се буди. Во една фабрика за текстил работниците почнуваат да шијат облека со репарираните машини.
-Кога луѓето ќе видат дека бизнисот во градот почнува да функционира, ќе почнат да се враќаат и заедно ќе го направиме Алепо големо какво што некогаш беше, вели Рами Абу Суф.
Алепо е историски град под заштита на УНЕСКО, но денес лежи на урнатини. Една од најголемите битки е водена токму за цитаделата. Која се наожа на највиската точка на градот.
Древната цитадела некогаш беше упориште на најголемите битки за градот. Еден од најстарите градови на светот повторно има шанса за се подигне од урнатините.