Кандидатите за претседател на САД од Републиканската партија, минатата вечер помеѓу другото, дебатираа и како да се запре ИСИС, во првата дебата по терористичкиот напад во Париз , и неодамнешниот напад во Калифорнија .
Сенаторите Марко Рубио и Тед Круз разменија неколку зборови во тензична атмосфера, судирајќи ги ставовите за надзор и политиката за миграција.
Размена на жестоки зборови имаше и помеѓу Џеб Буш и Доналд Трамп.
Трамп пак, во своето објанување се бранеше дека предлогот за забрана на муслиманите да влегуваат во САД не е поради религијата туку поради безбедноста.
Големото прашање на оваа последна дебата во 2015 година помеѓу Републиканците сепак беше како да се надмине рејтингот на Доналд Трамп.
Судирот на ставовите не беше фокусиран кон политиките кои ги предлага Трамп, а според анкетите и неговиот рејтинг, тие се популарни помеѓу гласачкото тело, иако тоа беше очекувано. Минатата недела американскиот бизнисмен беше на насловните страници на речиси сите медиуми од светот кога повика на затворање на влезот на САД за муслиманските мигранти и туристи. Тој и за време на дебатата цврсто стоеше зад својот став.
Понатаму во дебатата еден од најинтересните судири беше помеѓу гувернерот од Њу Џерси, Крис Кристи и кандидатот Ренд Пол.
Кога на дебатата стана збор за учеството на САД во Сирија, Кристи потенцираше дека во земјата треба да се стави забрана за било какви летови, вклучувајќи ги авионите на Русија кои се длабоко инволвирани во воздушни напади.
– Ќе ги собориме авионите на руските пилоти доколку тие бидат доволно глупави да мислат дека овој претседател ќе биде истиот немоќен плачко кој седи во Овалната соба во моментов, рече тој.
На ова Пол одговори дека доколку Американците се за лидер кој ќе ја започне Третата светска војна, Кристи е кандидатот на кој треба да му ја дадат поддршката.
– Она што сакаме е разумен лидер, а не некој кој е безобѕирен, рече Пол.