Претставен проектот за конзервација и ревитализација на на црквата „Свети Ѓорги“ во Старо Нагоричане, Кумановско, како значаен културно-туристички комплекс, кој е финансиран преку ИПА-фондовите на Европската Унија.
Министерката за култура Елизабета Канческа-Милевска, заедно со шефот на Делегацијата на Европската Унија во Скопје, амбасадорот Аиво Орав, и директорот на Националниот конзерваторски центар, Мемет Селмани денеска беа во посета на црквата „Свети Ѓорги“.
За реализацијата на проектот се веќе обезбедени вкупно 1.422.000 евра од кои ИПА средствата изнесуваат 1.166.000 евра, додека националното кофинансирање е 256.000 евра, информира Министеството за култура.
Во изминатиот период беше комплетирана обемната тендерска документација, која се однесуваше на изработката на архитектонските планови, геодетските и геолошките истражувања.
Веќе е потпишан и директниот грант со кој ќе се финансираат сите конзерваторски работи на црквата и камбанаријата. Завршена е и тендерската постапка за избор на фирма која што ќе ги врши градежните работи на плоштадот во селото, старата училишна зграда која ќе се адаптира во етнолошки музеј и партнерното уредување.
Целокупниот проект согласно предвидената динамика треба да биде завршен во втората половина на 2015 година.