Наодите од ревизијата на проектот „Скопје 2014“, изработена од поранешните претседатели на Антикорупциската комисија Слаѓана Тасева и Драган Малиновски, денеска одaт во Обвинителството.
Градоначалникот на Центар, Жерновски, се надева дека обвинителството и судот нема да потпаднат под политички влијанија и дека ќе ги санкционираат сите неправилности.
Ревизијата на Скопје 2014 констатираше голем број неправилности и сомнежи за злоупотреби. Плаќано е повеќе отколку што требало, директно е преговарано за износите, некои од спомениците се уште не се поставени иако се платени, избрани се едни, а договорите се склучени со други автори.
Според извештајот, споменикот на Методија Андонов Ченто требало да чини неколку илјада евра, но за него се потрошени 1 милион евра.
Споменикот на Никола Карев првично било планирано да се направи од бронза и да чини 5 милиони денари, но потоа со нова одлука, сугерирано е да се направи од мермер за цена од 45 милиони денари. Сепак, на терен може да се види дека скапо платениот споменик е направен од бронза.
ВМРО-ДПМНЕ ги отфрли наводите на комисијата формирана од општина Центар, оценувајќи ги како политички мотивирани и побара поднесување тужба од Жерновски, “наместо да ја префрлат топката бегајки од можноста за контратужба за лажно обвинување” соопшти минатата недела владејачката партија.