Екстерното тестирање ќе има многу корекции во текот на следната година, а една од забелешките која ја добиле е да се создаде можност самите ученици веднаш по завршувањето на тестирањето да го видат резултатот, најави министерот за образование Спиро Ристовски.
Според него сега постои можност за увид во тестовите, односно дека родителите и учениците треба да се обратат до соодветната комисија во училиштето.
– Нашата интенција е догодина тоа да биде многу побрзо и потранспарентно и е една од фазите која ќе биде преземена во насока на корекција на она што беа забелешки од досегашната имплементација на екстерното тестирање, нагласи министерот за образование.
Во врска со одредени забелешки од родители околу екстерното оценување, министерот Ристовски апелираше родителите и учениците кои имаат било какви забелешки поврзани со прашањата или содржината на тестовите од екстерното тестирање да упатат известување по електронска пошта или лично да достават до Државниот испитен центар.