Португалија буди прекрасни спомени за Стефан Ристовски. Мина, како што вели, четири убави години во Лисабон како член на Спортинг, а во земјата во која вечерва ќе ја предводи македонската фудбалска репрезентација по мундијалска виза стана и татко. Се надева дека и Порто вечерва ќе биде трајно врежан во неговата меморија како место за уште еден историски резултат на „црвено-жолтите“.
„Тука е роден мојот син, тука минав четири прекрасни години со екипата на Спортинг Лисабон. Имам голем број на пријатели овде, но не очекував дека ќе дојдам во ситуација да играм против Португалија за пласман на Светско првенство“, истакна Ристовски на прес-конференцијата пред вечерашниот меч.
Вели дека има пријатели и меѓу португалските репрезентативци со кои е во контакт. Пријателството, нагласи тој, ќе остане и по мечот, без оглед на конечниот епилог, меѓутоа во претстојните 90 минути на „Драгао“ во Порто, тоа ќе остане на страна.
„Денеска за мене ќе постои само репрезентативниот дрес, Македонија и желбата да одиме во Катар. Пред седум-осум години, нашата репрезентација беше во некаква изолирана позиција и далеку од вакво европско друштво. Но, сега сме на прагот на Светско првенство. Ние сме пред еден од најважните мечеви во историјата. Нема да застанеме тука, што и да се случи. Можеби немаме услови за работа, но талент, секако, дека имаме. Тоа и го покажуваме и тоа треба да биде поттик за успеси и во иднина“, истакна Ристовски.