Искинати душеци, чаршави со дупки, искршени боксеви за раѓање, рѓосана вага за мерење на бебињата, апарат за кислород и инструменти како од времето на втората светска војна. Вака отприлика изгледа одделот за гинекологија и салата за раѓање во Клиничката болницата во Штип.
Овие фотографии во НОВА ги испрати една од жените што се породила таму и за малку избегнала инфекција.
И други родилки реагираат на условите во гинеколошкото одделение, но и на односот на персоналот.
“Условите се катастрофални, а персоналот е арогантен. Само да си ручаат и кафе во собата да пијат, дали им се потребни на пациентките не се замараат многу“, раскажа за НОВА една млада жена која се породила во болницата во Штип.
Оваа Клиничка болница опслужува околу 200 000 луѓе од Штип и околината. Во неа пракса изведуваат и студентите по медицина и специјализантите од штипскиот универзитет.
Министерот Тодоров често оди во посета на штипската болница. Ниту еднаш не најавил нови кревети или инструменти за родилната сала во одделот на гинекологија, додека за три години биде готова капиталната инвестиција, новата болница.
Во август минатата година Тодоров ја најави новата болница чија изградба требаше да започне во октомври 2015 година. Иако тендерот беше распишан уште лани, почетокот на изградбата беше најавен на почетокот на март. Изградбата на болницата ќе чини 30 милиони евра, заедно со опремата 56 милиони евра.
Слична е состојбата и тетовската болница и во другите градови во внатрешноста. Гинеколози за НОВА коментираат дека веќе нема дилема зошто во 21 век родилки и бебиња умираат од сепса, и зошто Македонија е на прво место во Европа по смртност на доенчиња.