Две малолетни деца од кои едното има 12 , а другото 17 години биле тепани и малтретирани од неколку припадници на единиците за брзи интервенции Алфи, обвинија нивните родители. Децата кои се од ромска националност во понеделникот вечерта биле пресретнати од алфите пред црквата „Св.Спас“ кај скопското Кале при што им бил вршен притисок да признаат дека украле женска ташна, а при тоа била употребена сила, клоци, тупаници и шамари, по што децата завршиле во болница.
– Го пратив син ми да купи нешто за јадење, ние живееме блиску во бараките, но по пат него и братучедот ги пресретнале алфите и почнале да ги тепаат. Кога ми јавија веднаш истрчавме сите. Децата беа тепани и малтретирани пред наши очи за нешто што не го сториле, околу 30 луѓе сме сведоци на бруталноста на алфите, изјави пред камерата на НОВА Рамиз Усеинов татко на Арамандо, едно од децата.
Семејствата во шок, случајот го пријавиле во Хелсиншкиот комитет и во невладината организација „Амбрела.“
Во просториите на Амбрела се јави родителот и побара помош бидејќи била употребена прекумерна сила, децата не сториле ништо. Кога не е докажано никакво дело, па дури и да имало дело, децата не треба да се малтретираат и тепаат, вели за Љатифе Шикова од невладината Амбрела.
Во Хелсишкиот комитет, кои дојдоа пред полициската станица каде што се вршеше сослушување на децата, велат дека се на почеток на постапката, но случајот ќе го следат до крај.
– Слушнаве сериозни наводи за злоупотреба на службената положба ,особено на малтретирање од страна на полицијата и тоа за жал на малолетно лице, за што има сведоци и лекарски наоди. На почеток на постапката сме, она што можам да кажам е дека ќе ја следиме во целиот нејзин тек, изјави за НОВА Воислав Стојановски од Хелсиншкиот комитет. .
Во СВР Скопје велат дека немаат пријава за против полициските службеници, но доколку семејствата сметаат дека има пречекорување на службената положба да пријават во Внатрешна контрола на МВР.
Во Хелсиншкиот комитет пак, велат дека ова не е прв случај алфите да ја злоупотребат својата службена положба и да употребат прекумерна сила. Пред месец и половина во Хелсиншки е регистриран уште ден случај на брутално претепување од страна на алфите и тоа на истото место кај црквата Св. Спас. Случајот е пријавен и во Внатрешна контрола на МВР, но надлежните се уште не се изјасниле, ниту покренале било каква постапка против припадниците на алфите.