Со доаѓањето на зимата, расте стравот и загриженоста на родителите како да се спречи ширењето на коронавирусот во училиштата. Тие бараат наставата да продолжи да се одвива онлајн за учениците, бидејќи како што велат, постојано расте бројот на заболени од вирусот.
– Училиштата константно имаат ученици заболени од корона вирусот. Освен тоа, училиштата немаат средства за хигиена, па самите родители сме приморени да купуваме, вели родител кој сакаше да остане анонимен.
Од фејсбук иницијативата “Поддршка за онлајн настава” се обратија и до министерката Царовска, министерот Филипче како и до Комисијата за заразни болести.
– Голем дел од децата и наставниот кадар се заразени од оваа непредвидлива и смртоносна болест. Многу забоелни. Наставниците се очајни,исплашени да не бидат избркани од работа, а тие се ставени исто во голем ризик, вели Ана Глигорова од иницијативата.
Нова ТВ го исконтактира Министерството за образование и наука, од каде што велат дека наставата во основните и средните училишта и во наредниот период продолжува да се одвива со физичко присуство.
– Тоа е од највисок интерес за учениците и едно од најпосакуваните сценарија. Состојбата со Ковид-19 е стабилна. Министерството за здравство и МОН продолжуваат на дневно ниво ја следат состојбата и да прават проценка. Препораките за промена на моделот на настава ги дава Комисијата за заразни болести, информираат од ресорното министерство.
Анализата на Министерството за здравство покажува дека е голем бројот на невакцинирани граѓани кои се заразиле со Ковид- 19.
– Во период од 06.08 до 04.11.2021 на територија на државата 48.955 граѓанин, се позитивни од тестирани на Ковид 19, од нив 28% биле целосно вакцинирани, односно 13.886 лица. Голем е бројот на невакцинирани граѓани кои се заразиле со Ковид 19. Според статистика за изминативе два месеци, 35.069, граѓани, односно 72% од позитивните на Ковид 19 не биле вакцинирани. Процентот на хоспитализирани лица кои се невакцинирани изнесува 78%, додека само 22% од сите моментално хоспитализирани пациенти се целосно вакцинирани, велат од министерството.
Здравствените работници апелираат граѓаните да ги почитуваат мерките за заштита со цел да се спречи ширењето на вирусот. Велат, особено треба да се внимава во текот на зимските месеци, кога поради ладното, граѓаните се повеќе се групираат во затворени простории.
Тие предупредуваат да се избегнуваат масовни собирања на затворено, но и да не се заборава на задолжителното носење маски и миење на рацете.
Доколку за месец и половина граѓаните не се корегираат во своето однесување, според прогнозата на здравствените работници, во февруари не очекува нов бран на Ковид-19.
И.Р.