Роднини на двајцата осудени за убиството на Никола Саздовски поддржани од навивачката група „Шверцери“ попладнево на протест пред Кривичен побараа преиспитување на судската пресуда и преквалификација на делото од свирепо убиство во насилство со смртни последици.
„Заедно со семејствата и пријателите протестираме за правата на нашите пријатели и браќа. Го креваме гласот против неправда. Не бараме ништо повеќе од вистината. Поминаа две и пол години, се надевавме на правда, затоа молчевме. Но, одлуките засновани на етничка припадност не ни оставија простор да се надеваме… Осудените не сакале да му го одземат животот. Тие никогаш не размислувале за убиство, уште помалку за свирепо убиство. Постојат различни докази, но очигледно не сакаат да ги земат во предвид“, порачаа дел од присутните на протестот.
Семејството на убиениот Никола Саздовски и претставници на навивачката група „Комити“ пак вчера до Јавното обвинителство поднесоа жалба поради намалувањето на казните на извршителите на убиството од 19 на 16 години затвор.
„Максималната казна за ова дело е доживотен затвор, но за лица помали од 21 година, односно доколку извршителите немаат 21 година во време на извршување на делото не можат да бидат осудени повеќе од 20 години. Зарем тоа не е доволно олеснителен момент за овие лица. праша таткото на Никола, Тони Саздовски, по поднесувањето на жалбата.
Никола Саздовски, припадник на навивачката група „Комити“, почина по бруталното претепување на 29 јуни 2018 година. За свирепо убиство на Саздовски беа осудени Бесир Беља и Скендер Демири на по 19 години затвор.