Петар Андоновски со својот дебитантски роман „Очи со боја на чевли“ беше вистинско книжевно изненадување во 2013 година. Во исклучително силната конкуренција влезе во финалниот избор за „Роман на годината“ на Утрински весник, а со многу позитивни реакции беше оценет и од критиката и од читателите. Овој роман таа година не беше поддржан од Министерството за култура па самостојно го објави издавачката куќа „Кликер книги“.
И за второто дело Андоновски не доби поддршка од министерството, па излезе во издание на „Или-Или“ благодарение на екстремниот ентузијазам на тимот.
Сега „Телото во кое треба да се живее“ е во продажба за само 50 денари, односно колку што изнесува цената на печатење – авторот се откажал од хонорар, ИЛИ-ИЛИ од профит, своите услуги бесплатно ги понудиле Оливера Ќорвезироска (лектура), Маја Бојаџиевска (рецензија – поговор), Марија Смилевска (илустрација), Бојан Ивановиќ – Бригада. Мк (дизајн на корица), како и Снежана Младеновска – Анѓелков (графички дизајн).