Фото: Мета
Државниот министер во германското МНР, Михаил Рот, денеска на дебатата со студентите организирана на Правниот факултет, порача дека решението на политичката криза е во Скопје, а не во Брисел.
Рот порача дека краток е рокот за решавање на кризата и времето е лимитарно за да се спроведат реформите и целосно да се имплементира Договорот од Пржино.
– Сите рокови се пробиени, се опструира работата на Специјалното јавно обвинителство, не се спроведени реформите во медиумите и не е почнато со прочистувањето на Избирачкиот список. Фер и слободни избори се само првиот чекор, а тешкото следува потоа, рече Германецот надополнувајќи дека секоја влада има особена одговорност при вакви ситуации и треба да биде конструктивна при имплементирањето на Пржинскиот договор.
Михаил Рот ја потврди поддршката на Европската унија и на Германија за земјава, но истакна дека најголемите партии на позиција и во опозиција се тие кои треба да придонесат за стабилизација на ситуацијата.
– Политичката криза во вашата земја треба да се реши веднаш, нашите очекувања се јасни поради тоа што на маса имаме политички договор. Има уште малку време за да се имплементираат мерките кои се потребни за да се одржат фер и демократски избори во април. Кризата веќе го забави прогресот во вашата земја, негативниот тренд во демократското владеење е забележлив веќе подолго време. ЕК ги изрази загрижувањата поради назадувањето во слободата на медиумите и независноста на судството…а овие прашања не беа адресирани од страна на владата, рече тој.
Рот ги охрабри младите и граѓанското општество да бидат активни при своите барања и да го кренат гласот.
Според него, проблемот со името надвор од Македонија и Грција не е толку сфатлив но дека е оптимист дека двете страни можат да дојдат до компромисно прифатливо решение.
Осврнувајќи се на бегалската криза, Рот порача дека е потребна соработка помеѓу земјите-членки за да им се помогне на земјите во транзит за да се совлада предизвикот.
Одговарајќи на забелешките од цивилниот сектор, дека тие се чувствуваат игнорирани и немаат доволен увид при решавањето на кризата, како и тоа дека изјавите на еврокомесарот Јоханес Хан се конфузни, Рот побара разбирање за еврокомесарот, чија медијација не се одвивала само на овде, туку како што вели, Хан работел и на други полиња.
Од страна на студентите беше потенцирано дека тие не се навикнати на транспарентност од ваков вид, односно дека тие ретко или речиси никогаш не забележале министер од македонската Влада или пратеник од Собранието, да седне и да дискутира со нив.
Денешната дебата која траеше час и половина, беше организирана од страна на фондацијата Фридрих Еберт.