Време е ЕУ да и помогне на Mакедонија за влез во европското семејство, вие правите се што можете, а сега е на ред ние да го дадеме нашиот придонес, изјави државниот секретар за европски прашања на Германија Михаил Рот по средбата со шефот на македонската дипломатија Никола Димитров.
-На оваа земја и се потребни реформи и помирување. Првите чекори на Владата се во вистинска насока, но потребно е и опозицијата да се вклучи во процесот на нивното спроведување со цел да се напредува на патот на евроинтеграциите за што ја имате поддршката од Германија, рече Рот на прес-конференцијата со Димитров.
Одговарајќи на новинарско прашање, Рот истакна дека доколку се испорачаат резултати во однос на бараните реформи, како и во однос на градењето на односите со соседите, тогаш Германија ќе биде обврзана да испорача од своја страна.
– Новата Влада воведе мноштво мерки коишто треба да создадат повторно доверба меѓу другото и со Грција, но и со Бугарија. Сметам дека тоа е токму вистинскиот правец. Ова долго време беше потребно. Сигурен сум дека македонската Влада и понатаму ќе работи на намалување на тензиите и на градењето на доверба. Доколку се пружа раката за дијалог и јас имам очекување од другата страна тие партнери да ја прифатат пружената рака. Никој надвор од Македонија и надвор од Грција не го разбира спорот кој е комплетно апсурден. Мислам дека треба да оставиме историјата да си остане историја и да одиме кон заедничка иднина. Германија е подготвена доколку тоа се побара да даде поддршка во тој правец. Но, навистина ги ценам сигналите што во моментов се праќаат од овде. Тогаш и ние сме обврзани да ја поддржиме Македонија. Кога зборам ние, не мислам само на Германија, туку и на целата ЕУ. За да се отпочнат пристапни преговори потребен е консензус, истакна Рот.
Министерот Димитров, прашан за договорот за добрососедство со Бугарија, рече дека се уште е рано да се објават детали од договорот. Нагласи дека има уште три недели до најавената посета на бугарскиот премиер Бојко Борисов и дека претстојат уште некои чекори во рамки на кои треба да се информираат Владата и други политички актери по што и јавноста ќе биде информирана.
– Соопштувањето сега на прецизни формулации може да влијае на консултациите. Она што можам да го кажам е дека и македонската страна и бугарската страна се раководеа од начелото „ако те уништам тебе, ќе се уништам и себе“. Базата за компромис што ја постигнавме е добра основа да се потпише текст што и ние и Бугарија со горда и исправена глава ќе го потпишеме. Тоа беше целта и мислам дека двете делегации ги напуштија преговорите со чувство дека во рамките на околностите направивме максимум, изјави Димитров.