Eдна од најголемите руски рафинерии за нафта, Рјазан, привремено ја прекина работата откако украинската војска изврши неколку напади со беспилотни летала, јавува Ројтерс.
Според неименувани извори од индустријата, нападот запалил складиште за нафта и ја оштетил клучната рафинериска опрема. Меѓу оштетувањата се издвојува железничката утоварна станица, како и единицата за хидротретман, која се користи за отстранување на нечистотиите од преработените нафтени деривати.
Првиот украински напад врз рафинеријата се случи на 24 јануари, кога украинските сили ја гаѓаа рафинеријата со беспилотни летала. Само два дена подоцна, рафинеријата повторно беше цел на сличен напад. Руските власти потврдија дека нападот бил извршен со беспилотни летала, но не дадоа дополнителни детали за степенот на штетата предизвикана во вториот инцидент.