Руска ракета за воздушна одбрана наводно погодила станбена зграда во градот Ростов на Дон во додека пожар избувнал во блиската фабрика, објавија медиумите, повикувајќи се на сведоци и снимки објавени на социјалните мрежи.
Жителите на Ростов на Дон пријавиле гласни експлозии ноќта и објавиле видеа на кои се гледа како воздушната одбрана дејствува над градот, според руските канали на Телеграм. Руските власти предупредија за напад од украински беспилотни летала и издадоа неколку ракетни предупредувања за регионот.
Градоначалникот на Ростов на Дон, Александар Скрјабин, потврди дека избувнал пожар во стан, но тврдеше дека пожарот е предизвикан од остатоци од украински дрон. Гувернерот на Ростовскиот регион, Јуриј Слушар, изјави дека еден човек загинал откако станот се запалил.
Слушар, исто така, изјави дека за време на нападот со беспилотно летало избувнал пожар во индустриски објект, без да прецизира за која фабрика станува збор. Тој додаде дека гори и повеќекатна станбена зграда и дека службите за итни случаи се на местото на настанот.
Снимките објавени на социјалните мрежи сугерираат дека резервоарите за гориво во фабриката за бои и премази „Емпилс“ можеби биле цел на напади, иако во тој момент не беше јасно дали штетата е предизвикана од украински или руски оган.
„Кијив Индепендент“ соопшти дека не може независно да ги потврди извештаите, ниту тврдењата на руските службеници.
Околностите околу наводниот самонанесен напад сè уште не се разјаснети.
Иако руските сили претходно погрешно погодувале цели на сопствена територија додека се обидувале да ги одбијат украинските воздушни напади, Киев постојано ја обвинува Москва за оркестрирање на сложени операции со лажно знаме за ширење дезинформации и оправдување на војната во Украина.
Украинската војска сè уште не го коментирала наводниот напад.
Украина редовно извршува длабински напади врз воени и индустриски објекти во Русија, најчесто користејќи беспилотни летала од домашно производство.
Ростов на Дон се наоѓа на околу 100 километри источно од руско-украинската граница, по должината на Азовското Море, поради што пристаништето и неговата околина се честа цел на украински напади врз танкери за нафта и енергетски објекти.