„Советниците на рускиот претседател Владимир Путин се наоѓаат на раб, бидејќи војната на Русија со Украина се претвори во дебакл, откако руските војници се соочени со посилен украински отпор одошто очекуваа“, изјави Андреј Солдатов, руски истражувачки новинар и стручњак за руските воени и безбедносни служби, за „Њујорк тајмс“.
„Изгледа дека на работ се сите“, вели Солдатов.
Солдатов нагласи дека „руските воени неуспеси во едномесечната војна со Украина почнаа да ги откриваат „пукнатините“ во руското водство“, пренесува „Бизнис инсајдер“. Украинскиот отпор во голема мера го забави напредувањето на руската војска, а руските сили од тогаш ги засилија нападите врз повеќе градови во Украина.
„Дефинитивно може да кажеме дека ништо не оди по планот. Советската и руската војска со децении не доживеале така големи загуби за така краток временски период“, вели Павел Лузин, руски воен аналитичар, за „Тајмс“. Поради тоа, Владимир Путин, наводно, почнал да го „чисти“ кругот на свои блиски луѓе.
Претходно овој месец, украинските медиуми објавија дека Путин го отпуштил Роман Гаврилов, шеф на националната гарда. Рускиот весник „Комерсант“, пак, објави дека Гаврилов поднел оставка.
Една недела претходно, Солдатов рече дека меѓу сменетите службеници се нашол и највискиот руски разузнувач, кој бил задолжен за регрутирање на членови и за диверзантски операции во Украина, како и неговиот заменик. Двајцата, како што тврди Солдатов, се ставени во куќен притвор.
Несогласување со инвазијата, пренесува „Бизнис инсајдер“ повикувајќи се на „Тајмс“, изразиле и поранешен службеник на ФСБ, но и група на руските воени офицери кои предупредиле дека инвазијата на Украина би била „бесмислена и исклучително опасна“ и би ја загрозила иднината на самата Русија.