Претседателот Џо Бајден вчера се состана со генералниот секретар на НАТО Јенс Столтенберг во Белата куќа и повтори дека Алијансата е обединета во одбраната на Украина онолку долго колку што е потребно за да се бори против руските сили.
„Го зајакнавме источното крило на НАТО, јасно ставивме до знаење дека ќе ја браниме секоја педа од територијата на НАТО. Повторно велам: Посветеноста на Соединетите Држави на членот 5 на НАТО е цврста“, рече Бајден, повикувајќи се на основната одредба од повелбата според која нападот врз една земја членка се смета за напад против сите.
Пред средбата со Бајден , Столтенберг се сретна со државниот секретар Блинкен за да разговараат за , како што велат, „робусниот“ нов пакет одбранбена и политичка помош за Украина што ќе биде претставен на самитот во Вилнус на НАТО во Вилнус.
Воената помош подразбира 325 милиони долари и вклучува повеќе муниција за артилериски ракетни системи со висока мобилност, противтенковско оружје, оклопни возила, артилериски гранати и друга опрема.
„САД соработуваат со над 50 нации за да ги водат напорите за поддршка на самоодбраната на Украина од руската агресија“, рече Блинкен во изјавата.
Инаку генералниот секретар на НАТО за време на престојот во Вашингтон рече дека украинските сили „постигнуваат напредок“ со штотуку започнатата контраофанзива. „Колку повеќе земја можат да ослободат Украинците, толку посилна позиција ќе имаат на преговарачката маса“, рече тој.
Алијансата, рече Столтенберг, „ќе се согласи да ја одржи и засили поддршката за Украина“, која вклучува „посилна посветеност за зголемување на трошоците за одбрана“.
БЈ