Британската кралица Елизабета денес го слави својот “Сафирен јубилеј” по 65 години владеење. По смртта на тајландскиот крал Бумибол во октомври, таа стана најстариот кралски владетел на светот.
И покрај уникатниот јубилеј што досега ниту еден современ крал го нема достигнато, кралицата одлучи денес да биде за неа сосема обичен ден. Вчера на 5 февруари таа со сопругот војводата од Едимбург отиде на миса во црквата Сент Мери во Вест Њутон во близина на нејзиниот замок во Норфолк.
Кралицата има 90 години и вчера беше облечена во темно син и црн костум и шапка, насмеана како секогаш. Во нејзиното однесување ништо не укажуваше дека се подготвува за посебен ден овој понеделник.
И таа навистина нема предвидено никаква прослава на овој ден. Причината е веројатно што овој ден е за неа тажен. На овој ден почина нејзиниот татко кралот Џорџ VI. Па така таа одлучи да остане во замокот Сандрингам каде што згасна животот на татко и на 6 февруари 1952 година. Тој имаше 56 години.
Нема да има ни нов портрет на кралицата кој би го одбележал јубилејот. Сепак, Бакингемската палата денес објави портрет на кралицата кој е направен во 2014 година а автор е Дејвид Бејли. На портретот кралицата е облечена во син фустан а како накит носи сафир кој и бил подарен од татко и во 1947 година за нејзиното венчавање.
Свадбата на Елизабет и нејзината долгогодишна љубов Филип Маунтбатен
Крунисувањето на Елизабета на 2 јуни 1953 година
Една од првите фотографии на “Лилибет”, прекарот од младоста на кралицата родена на 21 април 1926 година
Нема сомнение дека оваа фотографија најмногу одговара на сафирниот јубилеј. Не знаеме дали во 2014 година било предвидено токму денес да се објави портретот.
Британците ќе и оддат почит на нејзиното височество со топовско пукање од Лондонската кула и Грин Парк како што бара традицијата.