Сали вели поканата e јавна и се однесува на сите експерти.
„Сега не е време да гледаме на кој начин и во каков формат била упатена поканата до професорите експерти, туку во услови на пандемија мора сите да ги засукаме ракавите и да дадеме свој придонес за што поскоро да излеземе од оваа здравствена криза“, вели министерот за здравство Беким Сали. Изјавата на Сали доаѓа по вчерашната реакција на тројцата лекари, Драган Даниловски, Никола Пановски и Вело Марковски, кои му забалежаа на министерот дека не ги повикал лично да бидат дел од Комисијата за заштита од заразни болести, туку поканата ја упатил преку социјалните мрежи. Сали вели, поканата била јавна, а се однесувала на сите експерти од фелата.
„Во овој случај, преку директен пост на Фејсбук ги поканив тројцата почитувани професори. Во услови на пандемија, во случај кога ние се бориме со еден вирус, мислам дека не би требало да постапиваме во начинот како сме повикани, туку треба да пристапиме позитивно кон поканата и да бидеме членови на Комисија или работни групи, каде се судруваат или се дискутираат агрументи со цел доаѓање на некое одредено привремено или трајно решение“, вели министерот Сали.
Сали вели дека Комисијата заседава секој вторник и ја евалуира епидемиолошката состојба од претходната седмица. Тој вели, оти лично секојдневно работел во насока на надградување на Комисијата за заштита од заразни болести.
Во однос на моменталната епидемиолошка состојба, министерот признава оти веќе десетина дена има благо покачување на бројот на хоспитализации поврзани со Ковид 19.
„Ја контролираме ситуацијата, капацитети на кревети има сосема доволно, и од асапект на кадар сме добро организирани, нам ни останува да почекаме малку за бројот да почне да се намалува“, вели министерот.
Во однос на нови рестриктивни мерки, министерот вели дека засега нема потреба од воведување на нови рестрикции. Пикот на вирусот се уште продолжува, па затоа надлежните велат дека укинување на сертификатите нема да има.
(Б.Б.)