Напорите за имунизација на населението против коронавирусот се силни, но ефектот е незадоволителен. Има пациенти кои се жртви на пропаганда, на теории на заговор, има отпор кон вакцината што не е јасно зошто се прави. Имаме протоколи за лекување на заразени лица со ковид-19 кои се напишани уште во 2019 година, меѓутоа можеби сме мрзеливи да читаме 30-тина страници материјал. Ова се дел од пораките на министерот за здравство, Беким Сали во вечерашното гостување во „Само вистина“ на Канал 5.
Посетив неколку ковид-центри низ државата и видов дека медицинскиот персонал вложува максимални напори, но жално е што бројот на вакцинирани граѓани е низок. Гледаме и пациенти кои се жртви на пропаганда додека ние се трудиме да ги развиваме нашите позитивни политики, истакна министерот Сали за односот на здравствените работници кон пациентите и, генерално, кон справување со ковид-кризата, но и за незадоволителното ниво на вакцинација на населението.
Во делот на протоколите за лекување на пациенти кои се позитивни на коронавирусот, Сали нагласи дека постојат. Креирани се уште во 2019 година од професори од Клиниката за инфективни болести по избувнување на пандемијата во Вухан. Материјалот од 30-тина страници го опиша како обемен, меѓутоа рече имало случаи на лекари кои се воделе по протоколи од соседните земји за што, сепак, истакна дека не е грешка.
Протоколот за лекување на ковид пациенти е дистрибуиран до сите здравствени институции. И јас лично го имам видено. Прилично е обемен, на 30-тина страници и во него е јасно наведено како треба да се постапува во одредени ситуации. Во изминатите две години, тој протокол претрпел измени врз основа на соевите на коронавирусот што се појавија во нашата земја. Искрено жалам што одредени лекари и институции не го следеле протоколот и дејствувале врз основа на кратки протоколи на соседни држави. И тоа не е грешка, но не можеме да речеме дека нема протокол кај нас. Ние можеби сме само мрзеливи да читаме протокол од триесетина страници, рече Сали.
Состојбата со коронавирусот во земјата, напомена Сали, се анализира на неделно ниво и врз основа на заклучоците се носат и одлуки, се преземаат чекори. Но, министерот вели дека општеството има отпор кон вакцинацијата што е голем проблем.
„Пикот на омикрон сојот е во благ пад, но сме во фаза на хоспитализации. Од аспект на кадар и на капацитети, здравствени власти имаат доволно за згрижување на пациентите. Она што е голем проблем е отпорот во општество кон вакцинацијата за што немаме финално решение. Меѓутоа и натаму ќе продолжиме со апелите за имунизација и обезбедување на доволни количини на дози на вакцините против коронавирусот, порача Сали.
С.Д.