Претседателот на Партијата за целосна еманципација на Ромите (ПЦЕР), Самка Ибраимовски утре ќе ја депонирал оставката од функцијата заменик-директор на Јавното Претпријатие за одржување и заштита на магистралните и регионалните патишта „Македонија пат“. Оваа одлука е донесена по денешниот состанок на Централното претседателство на партијата што се одржа во Тетово.
Ибраимовски рече дека ПЦЕР како една од најстарите коалициони партнери на СДСМ , од новиот лидер Ковачевски ќе барала партнерство за сосема поинакво учество во институциите, но какво не откри.
– Утре ќе ја депонирам мојата оставка од причини што не се исполнети ветувањата кои требаа да се исполнат кон нашата политичка партија. Остануваме во коалиција со СДСМ се до средбата со новиот мандатар Ковачевски, да видиме кои се неговите мислења во делот на нашата коалиција, односно дали ќе има парче колач од она што е ветено да се даде на ПЦЕР, изјави Ибраимовски по состанокот.
.