Само двајца од заразените со опасната бактерија листерија јаделе од сецканиот свински врат од Екстра меин, за останатите надлежните незнаат дали конзумирале од овој сувомеснат производ на кумановската фирма, потврдија за НОВА во Комисијата за заразни болести, и покрај тоа што токму овој производ и оваа компанија беа посочени дека се извор на заразата.
Според инфомации до кои дојде НОВА мајката на новороденчето од Кочани кое почина од листериозна сепса, воопшто не јадела свински врат, ниту било какви сувомеснати производи, за да може преку млекото да го зарази и своето бебе.
Оваа информација ја потврдија и во Центарот за јавно здравје во Кочани. За 55-годишната жена која почина од истата бактерија немаат прецизни податоци бидејќи семејството не знаело што јадела пред да се разболи.
-Во епидемиолошката анкета дадена од мајката на новороденчето нема податок дека мајката јадела свински врат. Таа објасни дека не јадела сувомеснати производи во последно време, но и дека вообичаено не конзумира таква храна.
Втората пациентка од Кочани која почина од бактеријата листерија веќе беше хоспитализирана на Инфективната клиника и за неа немаме прецизни податоци што јадела. Нејзиниот син не знаеше да каже што јадела мајка му, изјави за НОВА Благица Ѓурковиќ, директорка на Центарот за јавно здравје во Кочани.
И покрај тоа, службите во Центарот за јавно здравје во Кочани земале мостри од производи и површини од продавниците каде што починатите и нивните блиски најчесто пазарувале, но бактеријата листерија не е најдена.
Оттаму велат дека нема поврзаност меѓу овие два случаи, ниту пак дека јаделе свински врат.
Како што неофицијално дознаваме од Комисијата за заразни болести, Министерство за здравство одлучило да го објави името на фирмата заради предострожност на граѓаните.
Она што официјално го потврдија е дека генотипот од бактеријата најден кај заболените се совпаднал со генотипот на бактеријата што е пронајдена во свинскиот врат. Комисијата со 98 проценти сигурност потврди дека вакумираниот сецкан свински врат на Екстра меин е причинител на болеста која одзема четири животи, а петтмина заболеа.
– За два случаи со сигурност е утврдено дека јаделе од свинскиот врат, за останатите се претпоставува. Треба време за да се утврди кој е причинителот на заразата. И во Европа ваквите анализи се прават со месеци, изјави за НОВА Јованка Костовска раководител на секторот за превентивна заштита и член на Комисијата за заразни болести.
Експертите кои се занимаваат со оваа проблематика се зачудени како Министерството ја најде поврзаноста на спорниот свински врат на Екстра меин, кој беше повлечен од маркетите со останатите заболени. Како теоријата ја поврзаа со праксата.
Она што засега е заедничко за сите четворица починати велат епидемиолозите, е што скоро сите спаѓаат во ризичните групи. Еден од починатите е на возраст од 72 години, вториот е на 59 годишна возраст, а за новороденчето се смета дека е во ризичната група. За 55 годишната жена нема информација дали имала некоја хронична болест или пак била со послаб имунитет.
Во меѓувреме засилени тимови во сите градови во државата земаат мостри во маркетите и ги праќаат на испитување. Лабораторијата на Факултетот за ветеринарна медицина е затрупана со мостри, вработените вршат вонредни анализи и се преморени од работа, потврди деканот Дине Митрев.
Директорот на Агенцијата за храна Дејан Рунтевски за НОВА изјави дека се земени мостри од машините и од работните површини од истиот лот( спорната серија на свински врат која што беше повлечена) и дека резулатите се очекуваат во понеделник.
Досега девет луѓе заболеа, а четворица починаа за само еден месец. Починатите и заболените се од Скопје, Кочани, Охрид, Гевгелија, Македонски брод и Неготино. Нема заболени од Куманово каде Екстра меин има најмногу продавници.
Надлежните донесоа предлог мерки дури по објавување на првите смртни случаи, иако некои од нив биле хоспитализирани 30 дена претходно. Објавувањето на резулатите од анализите и името на фирмата беа објавени дури два месеци по првиот заболен случај.