Како точка на дневен ред на седницата на собраниската комисијата за земјоделство, шумарство и водостопанство да се разгледа склучениот договор со Субрата Рој, ќе бара опозициската СДСМ.
Според нив, склучениот договор предизвикал многубројни дилеми, по што прашуваат „кој е сопственикот на фирмата закупец, ако се има во предвид дека тоа не е Сахара Груп, туку лицето Suhbinder Singh Heer кој е жител на Лондон и државјанин на Обединетото кралство. Кое е ова лице и каква е неговата врска со Субрата Рој или Сахара Груп?“
Партијата прашува зошто фирма (ДПЗП Sahara Pure Eatables Corporation Limited ДООЕЛ од Скопје) со неуплатена основна главнина плаќа закуп од 120 денари месечно за хектар, а сите останати земјоделци во Македонија во земја од таков квалитет месечно плаќаат од 600 до 1.000 денари за хектар?
„ Агро – комбинатот Џумајлија во периодот од 2008 до 2010 год. на име на субвенции на земјоделско производство има примено вкупен износ од 1.300.000 евра. Доколку Субрата Рој, односно недефинираното правно лице – закупец, во наредните 3 години произведе исто колку што произведувал агро – комбинатот Џумајлија во тие 3 години, тогаш државата на име на субвенции е должна да му исплати на закупецот околу 1.300.000 евра, односно просечно околу 430.000 евра годишно. Во исто време истиот за добиените 430.000 евра годишно треба да плати закупнина во износ од 121.000 евра. Тоа значи дека по истиот основ му се овозможува да заработува по 300.000 евра годишно на сметка на државата, а без минимално да го подобри работењето на закупените капацитети, односно во добар дел да го пополни износот на банкарската гаранција“, изјави портпаролот на СДСМ, Петре Шилегов.
Шилегов рече дека и не знаат кој управува со „Џумајлија“ затоа што се води стечајна постапка за комбинатот.
– Во правната логика на нештата, капацитетите со кои располагала „Џумајлија” треба да влезат во стечајната маса, со цел истите да бидат продадени, за да се намират останатите доверители, што би се рекло земјоделците кои имаат право на парични побарувања од комбинатот и останатите доверители. Со вакво решение може да кажеме дека побарувањата на земјоделците и на останатите доверители во целост паѓаат во вода.
Оваа иницијатива за разгледување на склучениот договор, СДСМ ќе ја свика преку претседателот на комисијата Ленче Николовска.