„Премиерот Груевски се скри како и за сите проблематични прашања до сега. Бруталната сеча на историскиот парк кај хотелот Бристол е свесно спроведена во негово отсуство, додека тој е на одмор“, соопштуваат од СДСМ.
СДСМ нема да отстапи од барањето, Груевски лично да го објасни насилието во недела, во три часот наутро. Од таму прашуваат:
– Од кого се браневте премиере Груевски и министерке Јанкуловска?
– Дали од волјата на граѓаните кои не ги прашавте пред да ги доделите дозволите на местото на 50 годишните дрвја да никне баркно здание?
Ако власта беше убедена дека исправно постапува, немаше тајно да донесе моторни пили, среде ноќ со полициско обезбедување.
Освен што не се почитува определбата на жителите на Центар кои гласаа против политиките на оваа власт, во акцијата беа отстранети граѓани со влечење, по истиот принцип како во собраниските инциденти на 24 декември.
Затоа Груевски треба да излезе и да каже пред македонската јавност, дали на вакво пресметување со неистомислениците мислеше кога на Мечкин камен предупреди дека секој обид за оспорување на нивните политики, ќе бил пресретнат.
Дополнително, дрвјата се исечени во отсуство и на градоначалникот на Скопје, Коце Трајановски во чиј ингеренции е давањето дозвола. Бараме надлежните органи да го покажат документот, со чиј потпис е соголен паркот кај Бристол.
СДСМ повикува премиерот, градоначалникот, Владата веднаш да им ги дадат сите овие одговори на граѓаните кои тоа го очекуваат.