СДСМ го повикува лично премиерот Груевски да излезе и да го објасни, за како што велат, насилието што се случи во три часот наутро кај хотелот Бристол.
„Да се донесат моторни пили и полиција среде ноќ да го рамнат со земја паркот, без да се води сметка за вознемирувањето на граѓаните, е врв на покажувањето сила што `се е подготвена власта да направи за своите интереси“, се вели во реакцијата на Социјалдемократскио сојуз на Македонија.
Според партијата, синоќешниот начин на сечењето на дрвата и пресметката со граѓаните кои го бранеа паркот, е ист механизам употребен врз пратениците и новинарите.
„Груевски уште еднаш по кој знае кој пат ја погази јавно изразената волја на граѓаните на Центар кои на локалните избори јасно се искажаа против уништувањето на зеленилото заради бизнис интересите на власта…Ако сте премиер, Влада, власт, дали тоа ви дава за право да ја користите полицијата за свој штит?“, реагираат од СДСМ.
Според СДСМ, бруталноста, за како што го нарекоа синоќешното случување, може да престане само со дијалог, дебата, меѓусебно разбирање.
За нив, сечењето на зеленилото среде ноќ, е чин на кукавичлук и вандализам.
Инаку, паркот неодамна од страна на граѓанските иницијативи „Кислород“ и „Авангарда“ го доби името „Груевски“, за што оттаму, изразија надеж дека никој нема да се осмели да го исече паркот кој го носи неговото име.