„ВМРО-ДПМНЕ е несериозна партија, а тоа го докажуваат и со нивниот најнов предлог за промени на Уставот, токму на денот кога Собранието оди на одмор, според кој, се бара во највисокиот правен документ да пишува дека бракот се дефинира исклучиво како заедница помеѓу еден маж и една жена, а можноста посвојување на деца да им биде дозволено исклучиво на заедница составена од родители од различен пол, како и од самохрани родители.
– Дополнително, укажуваме дека ВМРО-ДПМНЕ веќе подолго време провоцира со политики на дискриминација и нетолеранција што резултираат со инциденти.
СДСМ бара ВМРО-ДПМНЕ да престане да ја дефокусира јавноста од клучните проблеми за граѓаните.
„Бараме за предлогот да се изјасни граѓанскиот сектор и академската заедница, пред да се пристапи кон планираните измени од страна на власта. Граѓаните на Македонија очекуваат решавање на горливите социо-економски проблеми, одговорен пристап од Владата кон прашањата од европската агенда и отстранување на сите укажувања за непочитување на правата и слободите на граѓаните, меѓу кои и на насилството врз припадниците на ЛГБТ заедницата.
– Во услови кога надлежните институции ги толерираат и не ги пронаоѓаат сторителите на овие инциденти, врз нивни домови, врз канцеларијата на Хелсиншкиот комитет, сметаме дека предлогот на ВМРО-ДПМНЕ ќе ја зголеми нетолеранцијата кон граѓаните со различна сексуална ориентација, ќе ја институционализира дискриминацијата и ќе придонесе за дополнителни поделби“, тврдат од СДСМ.