Советничката група на СДСМ и коалицијата денеска поднесе иницијатива за редовна седница на Советот на Град Скопје со единствена точка на дневниот ред – вонредни мерки против екстермното загадување на воздухот.
Предлозите се: времен прекин на сите градежни активности во Скопје, бесплатен јавен превоз за сите граѓани во деновите на екстремна загаденост, секојдневно миење на улиците во градот и вонредни контроли и доколку е потребно времено запирање на работата на сите субјекти кои поседуваат Б-интегрирана еколошка дозвола.
– Скопјани со години се мачат со проблемот со загадениот воздух. Овој проблем е од животно значење за сите граѓани без разлика на национална, верска или партиска припадност. И покрај се, Коце Трајановски се уште нема превземено ниту една мерка, нема воведено ниту една политика за намалување на загаденоста на воздухот, изјави Дамјан Манчевски, координатор на Советничката група на СДСМ и коалициските партнери, додавајќи дека иницијативата за редовна седница е откако не добиле поддршка од советниците од останатите советнички групи за итна седница посветена на предлог мерки за намалување на загаденоста на воздухот.