Советот на СДСМ остро реагира за за Нацрт-законот за поттикнување на домашното творештво во забавната и народната музика, кој вчера го презентираше министерката за култура Елизабета Канческа Милевска и смета дека се работи за нова мрежа на корупција на владејачката партија насочена кон категоријата гласачи од областа на популарната музика.
Според Советот, нацрт-законот ќе предизвика серија несогледливи штети по културниот систем во земјава бидејќи вкупните средства што се издвојуваат за поттикнување на класичното музичко творештво, преку Сојузот на композиторите и преку индивидуални проекти или нарачки, е приближно околу 10 илијади евра, што е околу 40 пати помалку од средствата предвидени за поттикнување на популарната музика во една година.
„Вкупните средства (200 песни годишно со просечни суми од околу 2000 евра) за време на траење на законот се околу 2 милиони евра.
Ова е всушност, уште еден мега-корпуциски скандал. Не станува збор за намера да се поттикне творештвото, ами за провиден начин државни средства да влезат во џебовите на естрадните уметници користени за партиски кампањи. Лицата што можеа да се видат на екраните, се главно оние што пееја на митинзите на владејачката партија или кои што читаа рекламни спотови за кандидатите на владејачката партија.
Владата ќе финансира песни за трето дете
Наместо вакви провидни, перфидни и дрски начини на злоупотреба на народните пари, Советот за култура на СДСМ предлага Владата да посвети поголемо внимание на ефективно враќање во функција на Музичката продукција на МРТ, со сите нејзини ансамбли, со целиот нејзин капацитет и со веќе докажаните стандарди.
Еден од најспорните аспекти на законот е промовирањето на сомнителна, квази-конзервативна агенда на семејни вредности што е неспоиво со забавниот карактер на поп културата. Очекуваме Министерството за култура да ги решава вистинските проблеми, а бројот на новороденчиња да го остави во доменот на приватните радости на македонските граѓани“, се вели во соопштението на Советот за култра на СДСМ.