Нема одложување на крајниот рок, кога до 1-ви април големите загадувачи мора да ги исполнат законските обврски и на фабриките да постават филтри и пречистителни станици. Ова денеска го потврди заменик министерот за животна средина Стево Темелковски.
Но, дали сите компании ќе успеат да се усогласат со оперативните планови, за до овој рок да инвестираат во системи кои ќе го намалат испуштањето на отровни материи. Ова особено, што министерот Абдулаќим Адеми пред три месеци се закани со клуч за оние компании што нема да ги направат потребните усогласувања.
Лиле Поповска, претседателка на ДОМ, Партијата на зелените, за НОВА вели дека во последните месеци има засилени контроли, а компаниите се стимулираат да одговорат на законската регулатива.
-Речиси сите компании се подготвуваат до 1-ви април да ги исполнат законските обврски. Единствено проблем има со„ Југохром“ од Јегуновце, кој нема финансиски средства за да инвестира во филтри. Сметам дека во овој случај треба да помогне Владата бидејќи „Југохром„ од една страна е голем загадувач, но од друга страна вработува многу луѓе, поради што неговото постоење е неопходно , изјави за НОВА Поповска.
И покрај настојувањето, не добивме одговор од раководството на „Макстил “АД, кoj e еден од најголемите загадувачи во Скопје, дали ќе се усогласат со стандардите.
Во септември минатата година Љупчо Зиков, лидер на Позитивна Македонија најави можност од затворање на фабриката, доколку се покаже дека не е финансиски исплатливо да се запре загадувањето.
Неофицијално,некои од компаниите како што се „Арчелор Митал“ и „Скопски легури“ веќе се при крај со подготовките. Раководството на Гигантот „Фени индустри“ неодамна пред кавадарчани вети дека ќе стават филтри со кои ќе се спречи загадувањето од честичките кои се штетни по здравјето на луѓето.
Според информации на НОВА, таму недостасуваат уште некои работи, а за две-три недели дефинитивно ќе се знае кој ги исполнува еколошките стандарди. Во Министерството за животна средина велат дека до крајот на февруари сите компании треба да достават детален извештај во кој ќе образложат до каде стигнале со остварувањето на обврската.
Инаку, откако Владата остана на ставот дека 1-ви април е краен рок за исполнување на обврските, дел од компаниите меѓу кои „Максил“, „Скопски легури“, „Југохром“, „Фени“, „Арчерол Митал“, и „Балкан енерџи груп“, побараа одложување на крајните рокови но, Владата го одби нивниот предлог.
Министерот Адеми тогаш ги посочи „Макстил“ и „Југохром“ како компании кои нема да стигнат да ги исполнат обврските до крајниот рок. Тој најави дека после овој рок, односно по 1-ви април ќе работат само оние фабрики што вложиле пари во изградба на филтри и пречистителни станици со кои ќе се спречи загадувањето. .
Само за потсетување, неодамна цементарница Усје ја пушти во употреба пречистителната станица со што ги исполни стандардите, а во последните неколку години фабриката инвестираше 36 милиони евра за заштита на еколошката средина.