Пораките меѓу вработени во УЈП и газдите на Пулс кои покажуваат инкриминирачка спрега се само дел од доказите кои ги поседува обвинителството и во нив има уште десетина инкриминирани дејствија, истакна денес Републичкиот јавен обвинител.
Коцевски ја потврди и информацијата на ТВ 24 дека постапката не е завршена ниту за Управата за јавни приходи, ниту за други институции. Ова следува по објавата на документираниот филм на ИРЛ, во кој се прикажува комуникација меѓу синот на сопственикот на кочанската дискотека и братот на претседателката на Кривичниот суд. Од пораките се гледа дека тие најавувале инспекции, примале подароци и ги користеле своите позиции за резервирање маси.
А дали УЈП ги проверува инспекторите кои ги предупредувале газдите на „Пулс“ за можни контроли во замена за подароци, прашавме и во УЈП. Од таму за 24 посочуваат дека можност за оддавање на даночна тајна, како и неовластено информирање за претстојни контроли претставува сериозно прекршување на Кодексот на однесување на вработените во УЈП и тврдат дека инспекторите се суспензирани додека трае постапката.
Управата за јавни приходи веднаш пристапи кон спроведување на внатрешна проверка на наводите изнесени во објавата и донесе Решение за суспензија на вработените лица кои се опфатени во случајот, сè додека трае постапката за утврдување на фактичката состојба. Оваа мерка е преземена со цел заштита на институционалниот интегритет, угледот на Управата и довербата на граѓаните.
Во меѓувреме, предметот против осомничените полициски службеници од Кочани и Штип, кој го води Обвинителството за организиран криминал и корупција, сè уште е во истрага, а причината за подолготрајното водење на постапката, според Коцевски е тоа што во предметот постапува само еден јавен обвинител.
Инаку, обвинението за „Пулс“ треба да биде оценето од Кривичниот суд до крајот на неделата, рок кој го дадоа и родителите на загинатите деца во страотниот пожар.