Новиот градоначалник на Охрид, Кирил Пецаков одобрил сеча на липи и костени на улицата „Македонски Просветители“. Токму на тоа место ќе се прави булевар.
Од општината Охрид се правдаат дека 49 липи и 13 костени се со надмината физиолошка и биолошка возраст, дрва нападнати од карантински болести и штетници со значителни физички оштетувања по разни основи и заболени дрва кај кои не постои можност за успешно санирање на нивната здравствена состојба.
– Овие стебла се наоѓаат на потегот од пресекот со Кеј ‘Македонија’ до пресекот со ул. ‘Даме Груев’ и ќе бидат отстранети при изведување на првата фаза од реконструкцијата на булeварот ‘Македонски Просветители’. На потегот се наоѓаат и 10 млади стебла од јавор кои ќе бидат пресадени на друга локација, а по завршување на градежните активности, согласно предвидениот проект ќе биде засаден нов дрворед со соодветни садници, велат од општината Охрид.
Од „Охрид СОС“ реагираат на ваквата одлука на градоначалникот Пецаков и наведуваат дека за да се реконструира улицата се корне деценискиот дрворед, односно 76 стебла, наместо проектот да се адаптира кон постоечкиот дрворед, за што, споредуваат, се прави во многу градови во светот.
– Овде безмилосно се корнат белите дробови на градот. Но, некој ќе рече, ќе се посадат нови садници. Да, но додека ја достигнат полната зрелост и капацитет на овие, ќе поминат децении. Зошто мора постојано да се сече, наместо да се бараат поинакви солуции?, реагираат од „Охрид СОС“.
Од оваа организација на охридскиот градоначалник, Пецаков, му посочија што тој ветил во изборна програма.
– Во предизборната програма на новиот градоначалник, на страница 25 e наведена мерката 1:5, односно за секое исечено дрво да се посадат пет нови. Според ова, на улицата ‘Македонски просветители’ би требале да се посадат нови 380 садници. Тоа би била новата зелена оаза во градот. Попусти се реакциите, и иницијални, од минатата година, кога се сподели намерата или предлог-проектот, и овие најнови, од повеќе страни, да не се сечат децениските стебла. И така јавното мислење никогаш реално и не се цени од страна на општинската администрација. Повеќе е „pro forma“. Најбитен е гласот да се добие, а потоа тие си се најдобри менаџери и проектанти на јавниот простор, наведуваат од „Охрид СОС“.