Седумдесет и четири наслови од светската и од македонската кинематографија, меѓу кои четири премиери, два кандидати за Оскар, голем број наградувани филмови на светските фестивали, познати автори и филмски таленти ќе продефилираат на 34. издание на Меѓународниот фестивал за филмска камера (ИФФК) „Браќа Манаки“ што ќе се одржи од 14 до 20 септември 2013 година во Битола.
Фестивалот, кој ќе се одржи под мотото „Пушти ја светлината“ во 10 програмски целини, ќе биде отворен со премиера на македонскиот филм „Соба со пијано“ на режисерот Игор Иванов.
Во главната програма има 12 исклучителни филма. Вип оператор пред најмладите ќе прикаже бесплатно 5 филмови за деца, 11 наслови ќе се „вртат“ во склоп на македонската панорама, 14 краткометражни проекти ќе има во програмата „Short matters!“ на Европската филмска академија. Ќе бидат проектирани 2 филма во чест на лауреатите Хосе Алкаин („Кожата во која живеам“) и Ањес Годар („Дом“).
Централен настан оправдано се очекува да биде Црно-бело со пијано, кога заедно со Кинотека на Македонија, првпат ќе бидат прикажани сите дигитализирани филмови од оставината на браќата Манаки во пијано придружба на групата „Маротови“, што ќе ги евоцира почетоците на филмската уметност и автентичноста на филмот пред неговото озвучување.
Од премиерите, две се во главната програма и по еден во програмата на документарен и на краткометражен филм. Поради голем интерес за филмот „Соба со пијано“ обезбедена е и втора проекција од 23 часот, на која пред публиката ќе се поклони целата екипа. Првпат за публиката ќе бидат прикажани и „Барајќи ја среќата“ на Марија Џиџева за ергените од Битолско кои бараат невести во Албанија и „Слатки“ на еден од најинтригантните израелски режисери, Јосеф Пичадѕе, а македонската премиера ќе има и стоп-анимацијата „Алерик“ на Вук Митевски, којa минатиот месец беше учесник на Сараевскиот ФФ.
-Секојпат велам дека ќе го имаме најквалитетното издание, но сега ќе оставам сами да ја разгледате програмата и да увидите дека овој пат најмногу ќе ги озариме лицата на гледачите со огромен број врвни филмски остварувања и реномирани имиња. Годинава имавме една ретка прилика да бидеме причина за мал, интересен спор. Имено, еден од кинематограферите во главната селекција, г-динот Фред Келемен, самиот инсистираше кај продуцентите на филмот „Слатки“ интернационалната премиера да ја има токму на „Браќа Манаки“. И светските и домашните кинематографери гледаат на фестивалот како на нешто свое. Сметам дека сите заедно ќе уживаме во секој момент од ова издание, токму затоа ги поканувам сите што можат да ни дојдат нагости во Битола – рече Лабина Митевска, директорка на Фестивалот.
На фестивалот ќе гостува дебатниот клуб од Битола Контра кадар со филмска дискусија. Фестивалот ќе понуди и 3 разговори со наградените со наградата за животно дело и со специјалната награда „Златна камера 300“, четири работилници, Втората балканска конференција на директори на фотографија со поддршка на ИМАГО, промоција на книгата „Теоријата и практиката на документарниот филм“ од Антонио Митриќески, сценариското катче, итн.
– Одличниот прием на содржините од минатогодишните програми наменети за најмладите нѐ поттикна годинава да одиме чекор понатаму, па покрај петте најнови филмски остварувања, во рамки на годинaшната „Вип детска програма“, креативните работилници за децата оваа година ќе бидат насочени кон креирање на уметност како спој на креативноста и технологијата – изјави Никола Љушев, генерален извршен директор на Вип.
Платен маркетинг