Јавната дебата за законите за медиуми е чиста фарса но сакам тоа да го знае јавноста и власта, изјави за НОВА Насер Селмани, претседателот на Здружението на новинари, кој денеска и покрај бојкотот од страна на ССНМ, МИМ и Иницијативниот одбор „Слобода за Кежо“ учествуваше на дебатата организирана од министерот за информатичко општество Иво Ивановски во хотелот Холидеј ин.
Во своето обраќање до министерот за информатичко општество Ивановски, тој искажа револт поради тврдењето на министериот дека новинарските организации кои ја бојкотираат расправата не доставиле забелешки за законот.
„Запрепастен сум што новинари бараат да се лиценцираат. Па ајде воведете и униформа за новинарите и по можност некоја трака. Зошто не е транспарентен податокот колку пари Владата троши во медиумите што е одговор од јавен интерес“, праша Селмани.
„Изминатиов период наместо да се спорат нашите ставови бевме цел на напади, спинови, клевети, навреди. Сметам дека и вие министре, сносите одговорност за спинот што се шири дека експертите имаат различно мислење за законот. Министре, не е проблем законот, ние не дојдовме на ова дереџе поради законите, туку затоа што државата премногу се меша во медиумите. Овие јавни дебати се како лицитација на берза и како да се ценкаме купи-продај, а главното прашање е дали ќе ги почитуваме меѓународните стандарди или не“, рече првиот човек на ЗНМ, Селмани.