Со полагање цвеќе и панихида денеска пред спомен-плочата беше одбележана 12-годишнината од загинувањето на 10-те прилепски припадници на АРМ во месноста Карпалак на автопатот Тетово – Скопје.
Семејствата на загинатите бранители побараа државата покрај плочата со имињата на загинатите кај Карпалак да постави спомен обележје како своевиден знак за благодарност кон тие што загинале во нејзино име.
„Остануваме на барањето што поскоро на Карпалак да биде подигнат споменик на загинатите бранители од прилепско“, рече Вецо Секулоски, брат на загинатиот бранител Пецо Секуловски.
Претставниците на здруженијата на бранители уште еднаш побараа сите тие да се здружат под едно централно здружение со што полесно би ги оствариле правата на своите членови и нивните семејства.
– Државата помогна што можеше да помогне, но животите на овие малди луѓе нема да се вратат, рече Пецо Петрески, брат на загинатиот бранител Марко Деспотоски.
На 8 август 2001 од конвојот со над 100 воени резервисти загинаа 10 прилепски бранители. Семејствата на загинатите, преживеаните од конвојот, здруженија, претставници ор АРМ и Касарната, од локалната самоуправа положија цвеќе пред спомен обележјето во кругот на касарната.
Прилепските бранители Нане, Сашо, Веби, Бранко, Горан, Ердован, Дарко, Љубе, Пецо и Марко заслужија во кругот на оваа касарна да имаат катче посветено на нив каде ќе можат граѓаните на Прилеп, а посебно учениците да дојдат, да го почувствуваат патриотизмот и да учат како се сака и брани татковината, затоа и ќе се реновира спомен собата.
Голем е револт кај бранителите и кај прилепчани бидејќи и по 12 години убиството не се знаат сторителите, многупати досега спомен обележјето кај Карпалак беше уништувано.
„Нека им е вечна славата на македонските бранители кои загинаа на денешен ден пред 12 години во заседата кај Карпалак. Ние, кои останавме живи, никогаш нема да ги заборавиме.
Ниту нив, ниту нивното дело за Македонија“, напиша на својот ФБ профил Стојанче Ангелов, претседател на „Достоинство“.