Според извори на Министерството за внатрешни работи на Ирак, во серија престрелки и бомбашки напади, загинати се 21, додека повредени 50 луѓе.
„Во нашиот последен извештај наведени се 21 загинати, од кои 7 се припадници на полицијата, и околу 50 повредени, од кои 15 се полицајци, во престрелки и вооружени напади во центарот на Багдад“, вели анонимниот извор за медиумот Ксинхуа.
Нападите се случиле околу 1 часот по полноќ, во рок од пет минути, кога вооружени лица разнесиле 3 автомобил-бомби, како и еден самоубиствен бомбашки напад близу владини згради во центарот на главниот град.
Автомобил-бомбите биле направени со цел да го пореметат вниманието на безбедносните сили, отворајќи пат за вооружените лица со бомбаш-самоубиец кој носел појас со експлозив, да влезат во зградата на Министерството за правда, но ирачките безбедносни сили возвратиле со оган.
Бомбашот-самоубиец се разнесил пред влезот на Министерството за правда, кога војниците отвориле оган, додека другите напаѓачи успеале да влезат во четири-катната зграда.
Засега никој не пријавил одговорност за нападите, но Ал Каеда често се прокламираше себе си за одговорна во повеќето смртоносни напади во земјата.
Насилство и спорадични бомбашки напади од висок профил сеуште се вообичаени во ирачките градови и покрај драстичното намалување на насилството од својот врв во 2006 и 2007 година, кога земјата беше зафатена од секташки убиства.