Романот „Сестрата на Зигмунд Фројд“ од Гоце Смилевски, преведен на преку дваесет јазици во светот, е објавен и во Бугарија. Издавач на делото на Смилевски е „Колибри“ од Софија.
Автор на преведот од македонски на бугарски јазик е Божидар Манов, професор на Националната академија за театарска и филмска уметност во Софија.
Романот „Сестрата на Зигмунд Фројд“, печатен во рамки на едицијата „Современа европска проза“, својата бугарска промоција ја имаше на неодамна одржаниот Фестивал на уметноста „Аполонија“ во Созопол. На промоцијата за романот на Смилевски зборуваа преведувачот Божидар Манов и издавачот Рајмонд Вагенштајн.
Бугарскиот весник „Сега“ во својата традиционална рубрика „Изданија на неделата“ го избра романот „Сестрата на Зигмунд Фројд“ заедно со книгите „Трагедии“ од Софокле, „Дервишот и смртта“ од Меша Селимовиќ и „Софиската Света Софија и нејзините проучувања“ од Асен Чилингиров.
За романот „Сестрата на Зигмунд Фројд“ Гоце Смилевски во 2010 година ја доби Наградата за литература на Европската унија.