На 15-тиот Конгрес на Социјалдемократскиот сојуз на Македонија, едногласно беа усвоени предложените измени и дополнувања на Статутот на партијата.
Една од одлуките, исто едногласно, е и новата функција на Радмила Шекеринска- заменик-претседател на СДСМ.
Претходно, претседателот на СДСМ , Зоран Заев во говор изјави дека Македонија и нејзините граѓани заслужуваат многу понадежна и посветла иднина- СДСМ тоа ѝ го должи на Македонија и тој долг ќе мора го подмириме . Во обраќањето тој возврати и на критиките кои неодамна на негова сметка ги пласираше премиерот Никола Груевски:
– Денес, човекот што им ја скрши кичмата на граѓаните на Македонија, го пеплоса ’рбетот на државата, човекот што во име на античките корења на нашиот народ го порази и погази достоинството на земјава и македонскиот народ сè уште не сфаќа дека има огромна разлика помеѓу свиткана кичма и скршена кичма. Ние сме силата што мора да ги оневозможи ветата што Груевски и неговата владеачка номенклатура ѝ ги наметнаа на Македонија. Притоа да бидеме на јасно – СДСМ нема да дозволи прав да падне врз нашиот национален идентитет, нашиот национален јазик и нашата национална посебност – рече Заев.
Во говорот пред делегатите Заев зборуваше и за европските перспективи на Македонија:
-Се распрснаа како меур од сапуница надежите на граѓаните за членство на земјава во европското семејство на држави. Македонија благодарение на концептот на премиерот не е ни вредна за спомнување од европските авторитети. Од лидери, станавме најголеми балкански лузери. Тажно и разочарано гледаме во грбот на довчерашните европски аутсајдери – Србија и Косово, а пред седум години чекоревме заедно со Хрватска – утре таа е полноправен член на ЕУ. За дебаклот Груевски дрско и безобразно ги обвинува сите – опозицијата, домашните предавници, меѓународната заедница… Цел свет е виновен, само тој не, рече Заев.