„Ако дозволиме Генералниот урбанистички план во 2022 година да го донесат истите луѓе што го донесоа во 2012, ќе живееме во истите кризи што ги живееме сега во урбанистичка смисла. Имаме делови од градот што се неповратни, а тоа не смееме да дозволиме да се случи со остатокот од градот“, кажа кандидатот за граодначалник на Град Скопје од СДСМ и коалицијата, Петре Шилегов на МТВ.
Тој додаде дека стратегијата за развој на градот е тој да се шири кон северниот дел, со цел да се заштитат оние делови каде што сега има прекумерна урбанизација.
„Градот мора да се шири, тоа е природен процес, но доколку сега не се постави стратегијата за наредните 20 или 30 години, повторно ќе ни се јават проблемите кои ги имаме сега. Затоа мора фокусот да го префрлиме во северниот дел. Затоа го правиме мостот во Карпош 4, кој ќе се спои со булевар Словенија и де факто ќе означиме простор каде што инфраструктурно градот ќе може да продолжи да се развива“, кажа Шилегов.
Тој истакна дека со неговиот тим има стратегија за енергетска политика, зазеленување и инфраструктура која верува дека граѓаните ќе ја препознаат и ќе овозможат Скопје за четири години да биде сосема поинаков град, квалитетен, европски и модерен.