Никола Груевски стои зад ревизијата на Охридскиот рамковен договор, потенцираше денеска пред новинарите пратеникот и портпарол на СДСМ, Петре Шилегов на прес-конференцијата пред Владата, кој покажа документ според кој владиниот Генерален секретар побарал тема на работните групи на партиите, да биде и анализата на Охридскиот рамковен договор.
– Што е целта на Груевски со овие документи за Рамковниот договор? Што ветил и кому?, побара Шилегов одговори од премиерот.
Пратеникот и портпарол на СДСМ, напоменувајќи дека Груевски се обидува да избегне одговорност и затоа власта делела флаери со измислици и лаги за федерализација, повторно пред јавноста го покажа документот со архивскиот печат на Владата, склучен пред четири месеци помеѓу власта и Европскиот институт за мир за Конференција на анализа на Рамковниот.
– Груевски е должен да излезе и да објасни што работи зад грбот на граѓаните, а што и да сака доцна е. Прашање на денови е кога Никола Груевски ќе го добие одговорот од граѓаните на единствена Македонија, порача Петре Шилегов од СДСМ.
Шилегов се осврна и на денешната седница на Судскиот совет на Република Македонија, за кој рече дека е строго контролиран од власта, а кој избра избра нови претседатели на Апелацискиот суд Скопје, на Основниот суд Радовиш и на претседателот на Основниот суд Берово.
– Ова само зборува за дволичноста на ВМРО-ДПМНЕ во фазата на преговорите за надминување на политичката криза. Договорено е да биде отворено прашањето за работата на судовите и извесно беше дека по завршувањето на преговорите за медиумите, следното прашање е за судовите. Очигледно е дека ВМРО-ДПМНЕ едно зборува, а друго работи зад грб, рече Шилегов.
Во однос на текот на преговорите на работните групи задолжени за спроведување на Договорот од Пржино, потпишан од лидерите на четирите најголеми партии, Шилегов ја обвини владејачката партија ВМРО-ДПМНЕ дека постојано намерно ги одложуваат предвидените рокови.