Шефот на австриската диплoматија Себастија Курц денес во Македонија доаѓа во потрага по решение за бегалската криза. Но се уште не е сосема јасно со каков предлог доаѓа Курц: дали ќе се залага за позицијата на Германија, Холандија и Франција или пак ќе застане на страна на земјите од Вишеградската група – Чешка, Полска, Унгарија и Словачка а во овој список може да се додаде и Словенија?
Германија, Холандија и Франција сметаат дека решението за оваа криза е пред се во Турција. Германската канцеларка Ангела Меркел три пати беше во Анкара во обид да ги убеди турските власти дека тие треба да ги држат бегалците кај нив, а земјите на ЕУ да ги земаат директно од Турција оние кои можат да добијат статус на азиланти – пред се Сирија и Ирак. Другите кои се економски мигранти, треба да се враќаат во нивните земји.
Истовремено Турција за ова ќе добие великодушна европска помош од 3 милијарди евра а на границата со Грција и во Медитеранот ќе работат европските гранични агенции и експерти за регистрација и идентикифување на бегалците.
И НАТО доби улога. Тој ќе плови низ Медитеранот, ќе ги спасува бегалците и ќе се бори против шверцерите.
Планот е Вишеградската група минува преку Балканот. Според аналитичарот Гералд Кнаус, овој план е не само опасен туку и неизводлив. За емисијата 360 степени на Алсат тој објасни:
– Идејата Балканот да се претвори во место на кое ќе се стопираат бегалците е себично од страна на Љубљана и земјите од Вишеградската група. Овој план е опасен и не може да успее, ќе го зголеми криминалот во чувствителен регион и ќе го дестабилизира Балканот, вели Кнаус додавајќи дека е важно “Македонија да не биде инструментализирана на смешен и опасен начин кој ќе донесе нова железна завеса на Балканот”.
Според Кнаус, во Австрија канцеларот и социјал-демократите во владата се согласуваат со Холандија и Германија и сметаат дека решението треба да се бара преку Турција. Но друга страна партијата на министерот за надворешни работи – а тоа се демохристијаните – “играат на картата на унгарското решение”.
– Кога Курц ќе дојде во Македонија неговите домаќини треба јасно да му кажат дека оваа граница од 200 км со високи планини и неколку езера, под ниту едни околности не треба да се претвори во нова “железна завеса”. Тоа едноставно не може да функционира а Македонија не може да биде обвинета”, рече Кнаус во 360 степени.
Но во меѓувреме Турција не покажува голема волја да ја послуша Германија. Претседателот Ердоган се заканува дека ќе ги испрати сите бегалци во Европа доколку таа не ги исполни дадените ветувања: брзо праќање на 3 милијарди евра помош но и слободен визен режим за Турција.
На крајот на идната недела во Брисел е закажан вонреден самит. Главна тема требаше да биде Брексит (можно излегување на Велика Британија од ЕУ) но нема сомнение дека бегалците ќе доминираат на овој самит.
Но пред самитот, на 15 февруари, четирите земји од Вишеградската група закажаа состанок на ниво на шефови на држави на кој се поканети само уште македонскиот претседател Ѓорге Иванов и српскиот премиер Александар Вучиќ. Целта е токму на билатерално ниво со македонската и српската држава да се договори заштита на ЕУ-границите и на Шенген-зоната.
Оттука, важно е да се чуе која порака денес во Македонија ја носи Себастијан Курц.