Притисокот кон власта ќе продолжи, но конкретните чекори во следниот период не ги откриваат ниту опозицијата ниту Шарената Револуција. Иако одбројувањето на демонстрантите заврши, барањата упатени до власта не се исполнија.
Ултиматумот кој гласеше – Уставниот суд да се изјасни за уставноста на СЈО, да прекине полицискиот прогон на демонстрантите и да се формира техничка влада за спроведување фер и демократски избори, истече на 18. јуни. Три дена подоцна, Судот се уште нема во план да ја стави на дневен ред Иницјативата за СЈО. За двајца демонстранти се уште постои опасност од казна затвор за демолирање на канцеларијата на Иванов, а не е договорен ниту датумот за избори, ниту Влада која би ги спровела истите.
Токму поради ова, учесниците на Шарената револуција велат дека власта ќе се соочи со различни форми на притисок понатаму, а идните чекори се координираат.
-Продолжуваме да бараме што погласно учество во решавањето на политичката криза и ќе ги применуваме сите форми на граѓански притисок. Ова форми не мора да подразбираат протести, може различни други граѓански реакции. Има активности кои не бараат голема бројка, но засега не би можел да откријам што понатаму, вели активистот Павле Богоевски.
Од СДСМ велат дека опозицијата е на иста линија со Шарената револуција и ќе ги поддржи сите нивни идни активности. Освен тоа тие велат дека ќе ги преземат сите институционални и вонинституционални можности за делување, но најава за конкретни чекори нема ни оттаму.
-Шарената Револуција секако дека ќе изнајде начини да ги димензионира активностите и покрај летниот период и високи температури. Ние како опозиција ја даваме максималната поддршка и ќе се обидеме да ги искористиме сите институционални и вонинституционални механизми за исполнување на барањата кои ги сметаме за целосно легитимни. Освен тоа, тука се и нашите барања во делот на избори, значи медиумска регулација и прочистување на Избирачкиот список и сигурно дека опозицијата ќе делува на соодветен начин, вели пратеникот од редовите на СДСМ Стефан Богоев за НОВА.
По завршувањето на рокот до ултиматумот, Шарената револуција вчера го одржа најмасовниот протест по речиси два месеци константен притисок од улица. Освен максималното количество на боја, демонстрантите се обидоа да го срушат и споменикот на Прометеј спроти Собранието, но во таа акција ги спречи полицискиот кордон.
Ваквиот протест денеска владејачката партија го квалификуваше како анархија предизвикани од платените хулигани на СДСМ и Сорос. Пред неколку дена и претседателот на ВМРО-ДПМНЕ Никола Груевски упати порака до шарените оти „народот вриел“ и дека не знае уште колку ќе можел да ја контролира ситуацијата.
Шарената револуција му возврати на Груевски дека е точно оти народот вриел, но како што велат тие, единствено врие од неговото, „диктаторско движење”.
– Верувам дека Груевски нема да ја може да ја контролира ситуацијата само ако тоа тој го сака. Сигурен сум дека на народот му врие, ама му врие од неговото диктаторско движење. Јас не би повикал никого да ни се приклучи, бидејќи тоа е индивидуална одлука, но би им ги поставил на сите граѓани следниве прашања: Aко не ние, кој? и ако не сега, кога?, прокоментира активистот Павле Богоевски за НОВА.