Гласањето за вториот круг од локалните избори и прегласувањето почнува во 7 часот, а завршува во 19 часот.
Записниците и другиот изборен материјал од гласањето, избирачкиот одбор ги доставува до општинските изборни комисии во рок од пет часа по завршувањето на гласањето. Општинските изборни комисии во рок од седум часа ги објавуваат првичните резултати, јавува МИА.
Изборната комисија на градот Скопје првичните резултати од изборите за градоначалник ги објавува во рок од 10 часа по завршувањето на изборите врз основа на податоците од општинските изборни комисии за градот Скопје.
Државната изборна комисија првичните резултати од изборите добиени по електронски пат ги објавува сукцесивно, а резултатите врз основа на податоците од записниците од ОИК во рок од 12 часа по завршувањето на изборите, а конечните резултати во рок од 24 часа од денот на нивната конечност.
Против решението на општинските изборни комисии односно Изборната комисија на градот Скопје може да се поднесе тужба до Управниот суд во рок од 24 часа по приемот на решението. Управниот суд е должен да донесе одлука во рок од 24 часа од приемот на тужбата.
Секој подносител на листа на кандидати во постапката за гласање, сумирање и утврдување на резултатите од гласањето може да поднесе приговор до ДИК и тоа во рок од 48 часа по завршувањето на гласањето односно објавување на првичните резултати. ДИК е должна во рок од 48 часа по приемот на приговорот да донесе одлука за приговорот, подносителот на приговорот по кој одлучувала комисијата може да поднесе тужба до Управниот суд во рок од 24 часа по приемот на решението. Управниот суд е должен да донесе одлука во рок од 48 по приемот на тужбата.
Секој избирач на кого му е повредено избирачкото право во постпаката на спроведување на гласањето може да поднесе приговор до ДИК во рок од 24 часа. ДИК е должна во рок од четири часа по приемот на приговорот да донесе одлука која пак може да биде обжалена пред Управниот суд во рок од 24 часа по приемот на решението. Управниот суд е должен да донесе одлука во рок од 48 часа по приемот на тужбата.
Политичките партии се должни веднаш, а најдоцна во рок од 30 дена од денот на завршување на изборната кампања да поднесат вкупен финансиски извештај за изборната кампања. Рокот истекува на полноќ на 21 април. Извештајот се поднесува на образец пропишан од министерот за финансии и тој се поднесува до ДИК, Државниот завод за ревизија, Државната комисија за спречување на корупција, Собранието на Република Македонија, а за локалните избори и до Советот на општината и Советот на градот Скопје.