Од денес започна со работа гинеколошката ординација во Здравствена станица Шуто Оризари-Скопје. Гинеколог во оваа населба ќе доаѓа само еднаш неделно, во среда и тоа во периодот од 9 до 14 часот. Од Министерството за здравство најавија дека од септември гинеколог ќе се обезбеди два пати неделно, во истото работно време.
-Согласно Програмските превентивни активности на Министерството за здравство, Здравствен Дом-Скопје и Специјалната болница за гинекологија и акушерство „Мајка Тереза“, склучија договор за меѓусебна соработка за обезбедување здравствена заштита на жените на ниво на примарно ниво. Во рамки на Договорот за соработка обезбеден е тим од специјалист гинеколог и медицинска сестра од страна на Специјалната болница за гинекологија и акушерство „Мајка Тереза“ во Чаир, кои ја користат опремата и постојниот простор во Здравствена станица Шуто Оризари, се вели во соопштението од Министерството за здравство.
Жените во Шуто Оризари не се задоволни од понуденото решение на Министертсвото за здравство. Велат дека гинеколог мора има секој ден, а не само еднаш во неделата.
-Не сум задоволна, би требало да има лекар секој ден и тоа да биде женско не машко, ние сме муслимани. Јас мојата снаа нема да ја пуштам да оди на маж гинеколог, а има многу семејства кои размислуваат исто, рече Асима Хасан жителка на населбата Шуто Оризари.
-Треба да има секој ден гинеколог, јас еве принудена сум да одам во населбата Железара. За да стигнам до таму плаќам по 250 денари за такси, изјави Алабина Амет.
И во невладината организација ХЕРА, велат дека ова не е трајно решение и не може да ги задоволи потребите на над 13 000 жени во Шуто Оризари.
-Ова не е трајно решение, со гинеколог кој ќе доаѓа еднаш неделно од 9 до 14 часот не може да се задоволат потребите. Единствено решение е да има лекакр секој ден и тој да биде матичен, за да може да издава упати и да ја следи бременоста континуирано, изјави за НОВА, Елизабета Божиновска, програмски координатор во ХЕРА.
Во изминатите неколку недели жените Ромки од Шуто Оризари масовно се потпишуваа на петицијата со која се бара во оваа населба конечно да проработи гинеколошката амбуланта. Жените Ромки, подржани од невладиниот сектор постојано апелираат во поликлиниката конечно да проработи гинеколошка амбуланта. НОВА континуирано го следи овој проблем и постојано известува за проблемите со кои се соочуваат.
.
Шуто Оризари е најголема општина државата, со над 22 000 жители. Се проценува дека во населбата живеат повеќе од 13 000 жени во репродуктивен период , од кои најголемиот дел примаат социјална помош, живеат во суспстандардни услови и не се здравствено осигурани. Жените се оставени без гинеколог од 2007 година.