Швајцарската фудбалска репрезентативка од албанско потекло, Флоријана Исмаили (24), по тридневна потрага, е извлечена мртва од дното на езерото Комо во Италија. Таа се водеше како исчезната од неделата попладне, откако исплови во изнајмен брод заедно со нејзина пријателка.
„Помислив дека сака да ме преплаши и дека одеднаш ќе се појави од другата страна на бродот. Врескав и го извикував нејзиното име, а потоа пријавив во итната служба“, вели нејзината пријателка.
Истрагата утврди дека од брегот се оддалечиле околу 14 часот и по 700. метри се стационирале да уживаат во сончевото време. Околу 16 часот, Исмаили скокнала од бродот да се освежи и од тој момент повеќе не се појави на површина. Нејзиното безживотно тело, според италијанските власти, е извлечено од длабочина од 204 метри.
„Езерото е подмолно. Има силни струи под мирната површина“, рече шефот на акцијата за спасување на фудбалерката чии родители потекнуваат од Прешево.
Исмаили беше капитен на Јанг Бојс. Ланската сезона ја заврши како најдобар стрелец на екипата со седум постигнати гола. За Швајцарија одигра 33 меча, последниот пред две недели, а беше дел од репрезентацијата и на Светското првенство во 2015 година.