Шведска се залага за воведување комесар за човекови права во новата Европска комисија која ќе стапи на функција на есен. Шведската министерка за европски работи Биргита Охлсон вели дека изборите за Европскиот парламент покажале дека тоа е неопходно, пишува денес порталот Еурактив.
“Незамисливо е тажно што расистичките, кеснофобските и популистичките партии пораснаа во Европа. Мислам дека ние, кои сакаме да ги заштитиме слободата и човековите права, мораме подобро тоа да го браниме и би било добро да има комесар кои ќе се занимава со тоа”, рече Охлсон во интервју за шведското радио.
Еурактив потсетува дека Удо Војт, поранешен лидер на Nationaldemokratische Partei Deutschlands (NPD), кој изразува почит за Алдоф Хилтер и изјавува дека «не повеќе од 340.000 Евреи» загинале во Холокаустот, е сега член на ЕП и дури и на Комитетот за граѓанска слобода. Во Франција Националниот Фронт доби 24 седишта а нивната лидерка Марин Ле Пен ја има споредено исламската имиграција во Франција со нацистичката окупација.
Шведскиот министер за надворешни работи Карл Билд изјави дека идејата е добра но дека вакво место мора да биде влијателно. За жал, смета тој, законската основа за оваа област ја донесува Советот на министрите и таа засега е преслаба.
Инаку се чини дека на сегашната шведска комесарка Сесилиа Малмстром нејзината влада ќе и го продолжи мандатот иако во септември има избори на кои нејзината партија можеби нема да победи. Таа засега ја покрива областа на внатрешните работи.