Продолжуваат инцидентите низ главниот град на Македонија, синоќа во Скопје каменувани два автобуса.
Во билтенот од МВР стои дека синоќа околу 20:30 часот, во с.Радишани-скопско од страна на непознати лица бил каменуван автобус на ЈСП бр.47, при што се повредени патниците Б.Ј.(17) и А.Р.(19).
Истите се пренесени во Ургентен Центар Скопје, каде им е укажана лекарска помош.
Подоцна вечерта во околу 23 часот на бул. „Гоце Делчев“, непознати лица каменувале автобус на ЈСП бр.50, при што е скршено едно прозорско стакло.
Како што известуваат од МВР, се преземаат мерки за откривање на сторителите.
Вчера утрото пак, во 10,30 часот во ПС Бит Пазар А.Д.(43) од Скопје пријави дека во саботата, во 14:30 часот (кога низ Скопје се случуваа уличните војни) на бул. „Никола Карев“ во близина на надвозникот кај Бит Пазар, додека се возел во автобус на ЈСП бр.61, од страна на пет-осум непознати лица бил сопрен автобусот, по што физички го нападнале А.Д., удирајќи го со тупаници и клоци по лицето и телото, од што му нанеле телесни повреди. Се преземаат мерки за откривање на сторителите.