За помалку од 24 часа истрелана е трета граната од сириска територија врз Голанската висорамнина во делот што го контролира Израел, пренесува Макфакс.
Според израелски воен извор не се предизвикани никакви штети пренесе РИА Новости.
Претставници на израелската армија претпоставуваат дека, како и во случајот од понеделникот кога во истата област паднаа две гранати, станува збор за случајни прелети на проектили од борите меѓу сириската владина војска и вооружената опозиција.
Меѓутоа, овие инциденти се случуваат во атмосфера на ескалација на тензиите во регионот по последните два воздушни напада на израелската авијација на цели на сириска територија, за која западни извори тврдат дека биле пратки ирански проектили наменети за шиитското либанско движење Хезболах со кое Израел во 2006 година водеше 34-дневна војна.
„Во вторникот експлодира проектил на отворен простор во јужниот дел Голанската висорамнина. Нема повредени, војската ја проверува областа на експлозијата”, изјавила неименуваната соговорничка за агенцијата.
За инцидентот израелската армија ги известила мировниците на Обединетите нации коишто го обезбедуваат почитувањето на режимот на линијата на израелско-сириското раздвојување. Во минатото Израел во неколку наврати при слични инциденти одговараше со артилериски оган врз сириски позиции.
На 5-ти јуни е годишнината од почетокот на арапско-израелската војна од 1967 година, кога е окупирана сириската Голанска висорамнина. Сопственоста на територијата и враќањето на коешто инсистира Дамаск и натаму останува главна тема на конфликтот меѓу Сирија и Израел.