САД и Русија бараат Сирија да го предаде хемиското оружје најдоцна до крајот на годинава, но очекуваат дека рокот за негово уништување до средината на 2014 година ќе биде пробиен, се наведува во нацрт документот што двете земји го доставија до Организацијата за забрана на хемиското оружје, пренесува МИА
Според документот поголемиот дел од хемиските материјали треба да биде изнесен од земјата за осум недели, до 31 декември, а останатите капацитети за хемиско оружје да бидат уништени до почетокот на март идната година.
Целосното уништување на сите токсични хемиски материи, како што се наведува во нацрт текстот, ќе биде извршено шест месеци по првично поставениот рок за уништување на сириското хемиско оружје.
Операцијата за уништување на сириското хемиско оружје беше договорена од САД и Русија во август, откако стотина лица загинаа во хемиски напад во близина на Дамаск. Организацијата за забрана на хемиското оружје треба до 15 ноември да усвои план за уништување на целокупното сириско хемиско оружје.